तिला पाहिले मी

तिला पाहिले मी फुले माळताना.

खुल्या चिंब केसात गंधाळताना.

फुलांचा नवा गंध कुरवाळताना.

तिला पाहिले मी कळ्या वेचताना.

कळ्यांच्या पहाऱ्यात शृंगारताना.

फुलांच्या विचारात रेंगाळताना.

तिला पाहिले मी मला पाहताना.

मला पाहुनी लाजुनी हसताना.

गुलाबी नशा देहभर सांडताना.

तिला पाहिले आसवे ढाळताना.

दिवास्वप्न भंगून चूरगाळताना.

सुरांना उरातून झिडकारताना.

तिला पाहिले मी फुले छाटताना.

फुलांना निखाऱ्यात भिरकावताना.

उभा देह ज्वाळात सुलगावताना.

संचिता कारखानीस.