माझी आई

माझ्या माहेरा अंगणी

खुले केवडा चंदनी.

त्याच्या गात्रात रुजली

आहे माझी आई.

माझ्या माहेरा दारात

सजे सडा नि रांगोळी.

त्याच्या रंगात भिनली

आहे माझी आई.

माझ्या माहेरा कौलांना

किती किती गं झरोके.

त्याच्या कोवळ्या उन्हात

असे माझी आई.

माझ्या माहेरा गोठ्यात

आहे कपिला साजिरी.

तिच्या दुधाळ पान्ह्यात

असे माझी आई.

माझ्या माहेरा खळ्यात

असे विहीर गं मोठी.

तिच्या अमृताच्या ओठी

हसे माझी आई.

माझ्या माहेरा शेतात

डुले सोनसळी पिक.

त्याच्या मोत्याच्या दाण्यात

असे माझी आई.

माझ्या माहेरा दिव्यात

तेला तुपाच्या गं वाती.

तेथे उजळत्या ज्योती

दिसे माझी आई.

माझ्या माहेरा गाभ्यात

असे विठाई माउली.

पण माझ्या गं राउळी

वसे माझी आई.

संचिता कारखानीस.